​ССВ: 2021 ЙИЛДА ЮРТИМИЗДА 82 ТА ОИЛАВИЙ ШИФОКОР ПУНКТИ ВА 19 ТА ОИЛАВИЙ ПОЛИКЛИНИКА ТАШКИЛ ЭТИЛДИ

Тиббиётнинг бирламчи бўғини аҳоли саломатлигини сақлаш, жамиятда соғлом турмуш тарзини қарор топтиришда беқиёс ўринга эга.

Шу боис, мамлакатимизда аҳолига бирламчи тиббий-санитария ёрдами кўрсатишнинг сифати, самарадорлиги ва оммабоплигини ошириш, тиббиёт ходимларининг жамиятдаги ўрни ва мақомини кучайтиришга катта эътибор қаратилмоқда.

Натижада бугунги кунга келиб, тиббиётнинг мазкур бўғини тўғридан-тўғри бемор билан ишлайдиган тизимга айланди.

Эътиборлиси, соҳани янада ривожлантириш мақсадида келгуси 3 йилда юртимизда 315 та оилавий шифокор пункти ва 85 та оилавий поликлиника фаолияти йўлга қўйилади.

Биргина, жорий йилнинг ўзида 100 та оилавий шифокор пункти, 17 та қишлоқда оилавий поликлиника ҳамда 7 та шаҳарда оилавий поликлиника ташкил этиш режалаштирилган.

Таъкидлаш лозимки, 2021 йилнинг ўтган тўққиз ойи давомида юртимизда 82 та оилавий шифокор пункти ва 19 та оилавий поликлиника ташкил этилди.

Жумладан,
 Қорқалпоғистон Республикасида 4 та оилавий шифокор пункти;
 Андижонда 5 та оилавий шифокор пункти, 3 та оилавий поликлиника;
 Бухорода 1 та оилавий шифокор пункти, 1 та оилавий поликлиника;
 Жиззахда 6 та оилавий шифокор пункти;
 Қашқадарёда 8 та оилавий шифокор пункти ва 1 та оилавий поликлиника;
 Навоийда 8 та оилавий шифокор пункти, 1 та оилавий поликлиника;
 Наманганда 9 та оилавий шифокор пункти, 1 та оилавий поликлиника;
 Сирдарёда 7 та оилавий шифокор пункти;
 Самарқандда 6 та оилавий шифокор пункти ва 4 та оилавий поликлиника;
 Сурхондарёда 8 та оилавий шифокор пункти;
  Тошкент вилоятида 5 та оилавий шифокор пункти, 3 та оилавий поликлиника;
 Фарғонада 10 та оилавий шифокор пункти, 4 та оилавий поликлиника;
  Хоразмда 5 та оилавий шифокор пункти, 1 та оилавий поликлиника фаолияти йўлга қўйилди.

Эслатиб ўтамиз, Президентимизнинг тегишли фармонига кўра, жорий йил 1 январдан бошлаб, умумий амалиёт шифокори мутахассиси оилавий шифокор, қишлоқ врачлик пункти оилавий шифокор пункти, қишлоқ ва шаҳар оилавий поликлиникаси эса оилавий поликлиника деб қайта номланди.

Шунингдек, терапия, педиатрия, акушерлик ва патронаж бўйича тиббиёт бригадалари ташкил этилди.

Соғлиқни сақлаш вазирлиги расмий телеграм канали — t.me/ssvuz 
Соғлиқни сақлаш вазирлиги Жамоатчилик билан алоқалар бўлими @ssvmatbuotkotib